Vüqar Rəhimzadədən adına saxta profil açanlara sərt ismarıc

"Açılan bu saxta profildə siyasi əqidəmə və mövqeyimə uyğun olmayan münasibətlərin, rəylərin yer alması ən azı vətəndaşlıq hüquqlarımın pozulmasıdır"

Yeni Azərbaycan Partiyası (YAP) Siyasi Şurasının üzvü, “İki sahil” qəzetinin baş redaktoru Vüqar Rəhimzadənin açıqlaması yayılıb.

Gün.Az xəbər verir ki, baş redaktor yaydığı açıqlamada Facebookda onun adına saxta profil açılmasına etirazını bildirib.

V.Rəhimzadə açıqlamasının girişində Azərbaycanda fikir və ifadə azadlığının tam təmin olunduğunu, müasir texnologiyaların sürətlə tətbiq edildiyini, lakin bu sərbəstlikdən sui-istifadə hallarına rast gəlindiyini vurğulayıb:

“İKT əsri olan müasir dünyamızda sosial şəbəkəyə qoşulmaqda hər bir vətəndaş sərbəstdir.

Azərbaycan əhalisinin 65 faizinin internet istifadəçisi olması bir daha onu göstərir ki, ölkəmizdə söz, mətbuat və fikir azadlığı mövcuddur və hər kəs öz fikrini sərbəst ifadə etmək imkanına malikdir.

Amma çox təəssüflər olsun ki, Azərbaycan dövlətinin siyasətinin əsasını təşkil edən vətəndaşın öz fikrini, əqidəsini heç bir təsirə məruz qalmadan müstəqil ifadə etməsi imkanından qərəzli istifadə edənlər də mövcuddur.

Facebook səhifələrində və bir sıra sosial şəbəkələrdə insanların istək və arzularına müvafiq debatlar və dialoqlar olduğu kimi, etik normalara cavab verməyən, daha ciddi desək təhqir, söyüş, təhdid, şəxsiyyətə toxunma hallarına yol verən naqislər də var”.

Baş redaktor açıqlamasının davamında Facebookda onun adına saxta profil açıldığını bəyan edərək, buna kəskin etirazını bildirib:

“Bu fikrimi bəyan etməkdə məqsədim odur ki, bir saat öncə bilmişəm ki, mənim adıma saxta profil açılıb.

Açılan bu saxta profildə siyasi əqidəmə və mövqeyimə uyğun olmayan münasibətlərin, rəylərin yer alması ən azı vətəndaşlıq hüquqlarımın pozulmasıdır.

Belə saxtakarlığa əl atanlar ilk növbədə bilməlidirlər ki, bütün fəaliyyətim boyu müstəqil Azərbaycan dövlətinin memarı, ulu öndər Heydər Əliyev ideyalarına həmişə sadiq olmuşam, onun siyasi kursunun layiqli davamçısı Prezident İlham Əliyevin siyasətini qətiyyətlə dəstəkləyirəm və bu ömrümün sonuna qədər belə də olacaq”.

V.Rəhimzadə özünün və rəhbəri olduğu media orqanının bundan sonra da öz kursunu inamla davam etdirəcəyini yazıb:

“Baş redaktoru olduğum “İki sahil” qəzeti daim dövlətçiliyimizin inkişafına xidmət edir, Heydər Əliyev siyasətinin və ideyalarının ən böyük təbliğatçısıdır.

Eyni zamanda Yeni Azərbaycan Partiyasının Siyasi Şurasının üzvü kimi siyasi, iqtisadi, demokratik proseslərdə vətəndaşlıq məsuliyyətimi aydın dərk edərək ön sıralarda gedən insanlar arasında olmuşam.

Bir daha bəyan edirəm ki, mən bu mövqeyimə görə qürur hissi keçirirəm və ömrümün sonuna qədər belə də olacaq”.

Baş redaktor onun adına saxta profil açanların qanun qarşısında cavab verəcəklərini bildirib:

“Bu baxımdan mənim adıma saxta profil açıb siyasi mövqeyimə uyğun olmayan yalan, böhtan məlumatlar yayanlar vicdanları qarşısında cavab verməklə, həm də Azərbaycanda dövlət səviyyəsində qorunan ali qanunlarımız qarşısında da cavab verməli olacaqlar.

Qoy bu saxta profil yaradanlar bilsinlər ki, belə çirkin, yaramaz əməlləri ilə mənim əqidəmə və mövqeyimə zərrə qədər də kölgə sala bilməzlər.

Bir vətəndaş kimi öz hüquqlarımı qorumaq haqqımı aidiyyəti qurumlardan rica edirəm: “Mənimlə bağlı belə yaramaz əməllərlə məşğul olanlar haqqında ciddi tədbir görülsün və onların kimliyi geniş ictimaiyyətə açıqlansın”.

168.az

Çox oxunan xəbərlər

168.az sosial şəbəkələrdə